Rutas por Asturias: Picu Urriellu e Pico Pienzu
15, 16, 17 DE AGOSTO DE 2024
Neste verán 2024, o Érbedo rutea polas terras asturianas, polas fantásticas paraxes que ofrecen as montañas veciñas. Os días 15, 16 e 17 de agosto, contando coa magnífica organización e guía das amigas e amigos de Saltapraos, desprazámonos aos Picos de Europa e a Serra do Sueve para "conquistar" os Picos Urriellu e Pienzu.
O Urriellu desde o miradoiro Pedro Udaondo. Foto de Berta GS (+ fotos) |
Día 1, xoves 15 de agosto.
Encontro en
Puertas de Cabrales, no aloxamento e lugar das nosas ceas Casa Luisa.
Ruta sinxela de aclimatación desde Puertas de Cabrales ata o miradoiro do Urriellu Pedro Udaondo, situado no pobo de Asiego. Este pobo foi nomeado pobo exemplar de Asturias no ano 2019.
- Distancia: 5 km (10 ida e volta)
- 200 metros de desnivel acumulado
- Percorrido por camiños veciñais e sendas.
- Duración aprox.: 1h 30 min. (en cada sentido)
Ao pé do Naranjo de Bulnes. Foto de JM |
- Distancia: 13,5 km
- 950 metros de desnivel acumulado
- Duración aprox.: todo o día
Desprazámonos en taxi 4x4 ata o colado de Pandébano (28 km aprox. pero case 1h de duración porque o percorrido é inicialmente por estrada de montaña pero logo por pista. Unha vez no colado de Pandébano comezamos a camiñar en dirección á veiga do Urriellu, que é como se chama en Asturias ao pico Naranjo de Bulnes. O camiño está moi ben sinalizado e é relativamente cómodo de camiñar, aínda que a pendente é considerable. Pasamos ao principio por malladas, con vacas pacendo, pero paseniñamente a paisaxe faise cada vez máis agreste e as vacas son substituídas por rebezos.
A partir do colado Vallejo xa se pode ver o pico Urriellu pero aínda cómpre camiñar bastante para chegar. Na veiga hai un refuxio que serve de base para escalar o pico. Desde o refuxio a base da parede hai unha media hora de aproximación, pero permítenos tocar esta mítica parede e ver o comezo de varias das vías de escalada.
A veiga do Urriellu atópase no corazón do macizo central dos Picos de Europa, e desde alí pódese contemplar a grandeza destas montañas. Despois xa baixamos polo mesmo camiño ata o colado de Pandébano, onde nos recollerán os taxis.
Miguel Sáenz de Santa María. Pico Urriello o Naranjo de Bulnes. CC BY-SA 3.0, vía Wikimedia |
Día 3. Sábado 17 de agosto
Subida ao pico Pienzu desde o miradoiro do Fito
O pico Pienzu é a cota máis alta da Serra do Sueve, cadea de montañas que se atopan a menos de 5 km da liña de costa, cunha altitude de 1.160 m que permite gozar desde a súa cima dunhas vistas espectaculares. É unha das cotas máis altas de toda Europa en relación á súa proximidade ao mar.
É unha ascensión sinxela desde o miradoiro do Fito, hai que salvar 600 m de altitude nun 6 km (12 km ida e volta), pero moi bonita. É un dos cumes emblemáticos de Asturias.
O miradoiro do Fito está a un 50 km de Puertas de Cabrales, pero xa en dirección cara ao oeste, polo que todos nos iriamos achegando xa cara a casa.
Este miradoiro é o punto de inicio e sitúase a unha altitude de 550 metros; desde alí, onde aparcamos os coches, xa se pode gozar dunha vista espectacular.
Wolffoxylady. Miradoiro do Fito. CC BY-SA 4.0, via Wikimedia Commons |
Comentarios
Publicar un comentario